Amnesty International kallar eftir rannsókn á eyðileggingu borgaralegra innviða af hálfu ísraelska hersins á Gaza og telur að þessar hernaðaraðgerðir teljist stríðsglæpir.
Rannsókn Amnesty sýnir að á tímabilinu frá október 2023 til maí 2024 hafi Ísraelsher með ólögmætum hætti eyðilagt heimili, skóla, moskur á austurhluta Gaza. Þessi eyðilegging, sem átti að stækka „hlutlaust svæði“ af öryggisástæðum, hafði áhrif á þúsundir íbúa og gerði stór svæði óbyggileg.
Helstu niðurstöður rannsóknar Amnesty International
- Eyðilegging borgaralegra innviða: Gervihnattamyndir og myndbönd á samfélagsmiðlum sem rannsóknar- og tæknideild Amnesty International greindi sýna að ísraelski herinn eyðilagði yfir 3.500 byggingar og spillti landbúnaðarlandi verulega. Svæðið sem var eyðilagt er 1-1,8 km á breidd meðfram austurhluta Gaza og er um 58 ferkílómetrar að stærð, eða um16% af Gaza.
- Umfang eyðileggingar: Yfir 90% bygginga og 59% landbúnaðarlands á umræddu svæði voru eyðilögð eða urðu fyrir alvarlegum skemmdum. Skýrsla Amnesty sýnir að eyðileggingin hafi haldið áfram eftir að ísraelski herinn tók yfir stjórn aðgerða á svæðinu, sem gefur til kynna að þessar hernaðaraðgerðir hafi ekki verið nauðsynlegar.
- Hóprefsing og stríðsglæpir: Kerfisbundin eyðing borgaralegra mannvirkja, sérstaklega þegar hún er framkvæmd eftir að átökum lýkur vekur áhyggjur um að verið sé að beita hóprefsingu sem er brot á alþjóðlegum mannúðarlögum. Ísrael segir að þeir hafi eyðilagt mannvirki sem tengdust hryðjuverkum eins og göngum og skotsvæði eldflauga en það réttlætir ekki umfangsmikla eyðingu íbúðabyggða og landbúnaðarsvæða.
- Áhrif á óbreytta borgara: Stækkun hlautlausa svæðisins hefur leitt til þess að þúsundir Palestínubúa hafa misst heimili sín og lífsviðurværi. Í bæjum eins og Khuza’a misstu íbúar heimili og bújarðir. Svæðið var einnig gjöfulasta matvælaframleiðslusvæði Gaza og er nú eyðilagt.
Alþjóðalög
Samkvæmt 147. grein fjórða Genfarsamningsins eru umfangsmiklar eyðileggingar á eignum sem eru ekki hernaðarlega nauðsynlegar og framkvæmdar með ólögmætum hætti og af tilefnislausu brot á sáttmálanum og þar af leiðandi stríðsglæpur.
Amnesty International bendir á að ef markmið Ísraela var að skapa hlutlaust svæði til að vernda fólk í Ísrael gegn árásum vopnaðra hópa, hefði verið hægt að leita annarra valkosta innan ísraelsks landsvæðis án þess að valda svo miklum skaða á borgaralegum eignum.
Í ljósi þess að eyðileggingin var það umfangsmikil og kerfisbundin og án lögmæts hernaðarlegs gildis ber að rannsaka þessar hernaðaraðgerðir sem stríðsglæpi. Að auki sýna sönnunargögn að sum heimili hafi verið eyðilögð í þeim tilgangi að refsa óbreyttum borgurum fyrir árásir vopnaðara hópa sem er einnig brot á alþjóðalögum sem ber að rannsaka.
Ákall um ábyrgð
Amnesty International kallar eftir ítarlegri rannsókn á þessum hernaðaraðgerðum. Í rannsókninni er bent á að eyðileggingin verði ekki réttlætt með öryggissjónarmiðum Ísraels þar sem hún virðist óhófleg og framkvæmd í refsingarskyni. Alþjóðalög banna árásir á borgaraleg mannvirki nema þau séu notuð í hernaðarlegum tilgangi á þeim tíma sem árásin er gerð. Í Gaza voru mörg mannvirki sem voru eyðilögð borgaraleg, og eyðing þeirra virðist hafa verið gerð í refsingarskyni frekar en nauðsynleg vegna hernaðarlegra ástæðna.
Rannsókn Amnesty International leggur fram sönnunargögn um mögulega stríðsglæpi sem ísraelski herinn hefur framið og kallar eftir ábyrgð og virðingu fyrir alþjóðlegum mannúðarlögum. Samtökin krefjast þess að alþjóðasamfélagið taki þessar ásakanir alvarlega og rannsaki hvort eyðileggingin í Gaza sé brot á Genfarsamningunum og öðrum mannréttindalögum.